నేచురల్ స్టార్.. వాళ్ల ముచ్చటెందుకు కాదనాలి?

యువ కథానాయుడు నానికి కెరీర్ ఆరంభంలోనే నేచురల్ పెర్ఫామర్ అనే పేరొచ్చింది. రెండేళ్ల కిందట ‘భలే భలే మగాడివోయ్’ సినిమాలో అతడి పేరు ముందు నేచురల్ స్టార్ అనే బిరుదు వేశారు. అప్పుడా విషయాన్ని అందరూ సరదాగా తీసుకున్నారు. తమాషాగా ఆ ట్యాగ్ తగిలించారేమో అనుకున్నారు. కానీ ఆ సినిమాలో నాని పెర్ఫామెన్స్ చూశాక మాత్రం అందరూ ఇంప్రెస్ అయి.. నిజంగానే నాని నేచురల్ స్టార్ అన్నారు. తర్వాత తర్వాత అది బాగా పాపులరైంది. నాని పేరునిప్పుడు ఎవరూ అలాగే పలకట్లేదు. ‘నేచురల్ స్టార్ నాని’ అనే అంటున్నారు. మామూలుగా చాలా సింపుల్‌గా ఉంటూ.. ఎంతమాత్రం స్టార్ లాగా ప్రవర్తించని నానికి ఇలాంటివి ఇష్టముండవేమో అనుకుంటాం. కానీ ప్రతి సినిమాలో నాని పేరు ముందు ‘నేచురల్ స్టార్’ అని పడుతుండటంతో అతను కూడా గ్రీన్ సిగ్నల్ ఇచ్చేశాడనే భావించాలి.

ఇదే విషయంలో నాని దగ్గర ప్రస్తావిస్తే ఆసక్తికర సమాధానం చెప్పాడు. ‘‘ఇంతకుముందు నేచురల్ స్టార్ లాంటివి తన పేరు ముందు అవసరం లేదని తాను దర్శక నిర్మాతలు చెప్పేవాడినని.. కానీ వాళ్లు వినేవాళ్లు కాదని నాని చెప్పాడు. ఐతే జనాలు ఎక్కడికెళ్లినా నేచురల్ స్టార్ నేచురల్ స్టార్ అనడం గమనించానని... వాళ్లంత ప్రేమగా పిలుచుకుంటున్నపుడు.. అలా ఫిక్సయిపోయినపుడు తాను మరీ పట్టుబట్టి దాన్ని వ్యతిరేకించాల్సిన అవసరం లేదని అనిపించిందని నాని అన్నాడు. అందుకే తన పేరు ముందు ‘నేచురల్ స్టార్’ అని వేస్తుంటే ఇప్పుడేమీ అభ్యంతరం చెప్పట్లేదని.. ఇలాంటివి వద్దు అన్న ఫీలింగూ లేదని.. అలాగే కావాలని కూడా లేదని.. ఏ అభిప్రాయం లేకుండా తటస్థంగా ఉంటున్నానని నాని తెలిపాడు.