అక్కినేని కుర్రోడిది మామూలు కష్టం కాదు

హీరోగా తన తొలి సినిమా ‘అఖిల్’ డిజాస్టర్ అయ్యేసరికి మొత్తం తన కాన్ఫిడెన్స్ అంతా పోయిందని ఇంతకముందే చెప్పుకొచ్చాడు అఖిల్. అతడి కెరీర్ కు ‘హలో’ ఇప్పుడెంత కీలకమో ప్రత్యేకంగా చెప్పాల్సిన పని లేదు. విక్రమ్ కుమార్ ఈ సినిమాను తీయడంతో మంచి ఫలితమే దక్కుతుందని అక్కినేని ఫ్యామిలీతో పాటు అభిమానులు కూడా నమ్మకంతో ఉన్నారు. దీని ప్రోమోలు కూడా జనాల్ని బాగానే ఆకట్టుకున్నాయి.

ఐతే కంటెంట్ ఎంత బలంగా ఉన్నా.. ముందు సినిమాను జనాల్లోకి తీసుకెళ్లడం కీలకం. అందుకే ‘హలో’ టీం అగ్రెసివ్ ప్రమోషన్లతో దూసుకెళ్తోంది. ముఖ్యంగా తన సినిమాను ప్రమోట్ చేసేందుకు అఖిల్ పడుతున్న కష్టం అంతా ఇంతా కాదు. మొన్న విశాఖపట్నానికి వెళ్లాడు. ఆడియో వేడుకలో పాట పాడాడు.. డ్యాన్స్ చేశాడు.. ఇంకా చాలా హంగామానే చేశాడు అఖిల్. ఆ తర్వాత పెద్దగా బ్రేక్ తీసుకోకుండానే అమెరికాకు వెళ్లాడు. అక్కడ మూణ్నాలుగు లొకేషన్లకు తిరిగాడు. ప్రతి చోటా డ్యాన్సులేశాడు. పాటలు పాడాడు. ఇందుకోసం రిహార్సల్స్ విషయంలోనూ చాలా కష్టపడ్డాడు.

ఇప్పుడు అమెరికా నుంచి వచ్చి నేరుగా హైదరాబాద్ లో ప్రి రిలీజ్ ఈవెంట్లో పాల్గొనబోతున్నాడు. బుధవారం జరగబోయే ఈ ఈవెంట్ కు మెగాస్టార్ చిరంజీవి ముఖ్య అతిథిగా రాబోతున్నాడు. ఈ ఈవెంట్ రొటీన్ గా ఉండదట. ఇందులోనూ అఖిల్ పాట.. ఆట ఉంటుందట. చిరు ముందు పెర్ఫామెన్స్ అంటే చిన్న విషయం కాదు. అందుకోసం అఖిల్ రేపు ఉదయమంతా రిహార్సల్స్ చేస్తాడట. తర్వాత లైవ్ పెర్ఫామెన్స్ ఇస్తాడట. మొత్తానికి తన సినిమాను ప్రమోట్ చేసే విషయంలో అఖిల్ కష్టం మామూలుగా లేదు. అతడి ఎనర్జీకి హ్యాట్సాఫ్ చెప్పాల్సిందే.