నేను, అఖిల్ ప్రేమగానే ఉన్నాం

జస్ట్ 24గంటల తేడాలో వస్తున్నాయి ఎంసీఏ, హలో సినిమాలు. రిలీజ్ డేట్స్ విషయంలో ఈ రెండు సినిమాల నిర్మాతలు (దిల్ రాజు, నాగార్జున) మధ్య చిన్నచిన్న అభిప్రాయ బేధాలు వచ్చిన మాట కూడా వాస్తవం. నాగార్జున, దిల్ రాజు ఆడియన్స్ కు ఎంత సర్దిచెప్పినా పోటీ మాత్రం తప్పలేదు. అయితే దీనిపై నాని మరోలా రియాక్ట్ అయ్యాడు.

"అంతా అనుకుంటున్నట్టు నాకు, అఖిల్ కు మధ్య పోటీ లేదు. నాకు తెలిసి రెండు సినిమాలూ హిట్ అవుతాయి. ఇదే విషయంపై నేను అఖిల్ ఛాట్ చేసుకున్నాం. ప్రేమగా మెసేజ్ లు కూడా పెట్టుకున్నాం. మేమిద్దరం ప్రేమగానే ఉన్నాం. కొందరు మాత్రం లేనిపోని పోటీ సృష్టించారు." ఎంసీఏ, హలో సినిమాల మధ్య పోటీపై నాని వెర్షన్ ఇది.

హలో సినిమా ట్రయిలర్ చూసి వెంటనే అఖిల్ కు ఫోన్ చేసి మెచ్చుకున్నానని, ఎంసీఏ ట్రయిలర్ కూడా బాగుందంటూ విక్రమ్ కుమార్, అఖిల్ తనకు కాల్స్ చేశారని నాని చెప్పుకొచ్చాడు. అసలు తమ మధ్య జరిగిన ఛాటింగ్ ను పబ్లిక్ లో పెడితే ఎలా ఉంటుందనే ఆలోచన కూడా ఒక దశలో తనకు వచ్చిందంటున్నాడు నాని. 

ఎటొచ్చి నాని చెప్పేదేంటంటే.. హీరోలు లేదా సినిమాల మధ్య పోటీనే ఉండదట. మార్కెట్లో ఎన్ని సినిమాలున్నా బాగున్న సినిమానే ఆడుతుందట. కాబట్టి ఎంసీఏ, హలో రెండూ ఆడుతాయంటున్నాడు. మరి రేపు హలో సూపర్ హిట్ అయి, ఎంసీఏ ఫ్లాప్ అయితే నాని ఎలా రియాక్ట్ అవుతాడో చూడాలి.