టాక్ ఎలా ఉన్నా.. నాని కుమ్మేశాడు

ఈ గురువారం రిలీజైన నాని కొత్త సినిమా ‘ఎంసీఏ’కు టాక్ ఆశించినంత గొప్పగా లేదు. రివ్యూలన్నీ యావరేజ్ అన్నట్లుగానే వచ్చాయి. సోషల్ మీడియాలో జనాల స్పందన కూడా మిక్స్‌డ్‌గా ఉంటోంది. రొటీన్ కథ అని.. సెకండాఫ్ తేలిపోయిందని.. అందరూ ఏకగ్రీవంగా తీర్మానిస్తున్నారు. ఐతే ఈ టాక్‌కు, తొలి రోజు వసూళ్లకు అసలు పోలికే లేదు. ఈ చిత్రానికి ఫస్ట్ డే కళ్లు చెదిరే వసూళ్లు వచ్చినట్లుగా ట్రేడ్ వర్గాలు అంచనా వేస్తున్నాయి. నాని సినిమా ఫస్ట్ డే వసూళ్ల రికార్డును ‘ఎంసీఏ’ భారీ తేడాతో దాటేసినట్లు అంచనా. నాని లాస్ట్ మూవీ ‘నిన్ను కోరి’ తొలి రోజు రూ.6.5 కోట్ల షేర్ రాబట్టగా.. ‘ఎంసీఏ’ ఫస్ట్ డే షేర్ రూ.9.5-10 కోట్ల మధ్య ఉన్నట్లు అంచనా వేస్తున్నారు. ఇదే వాస్తవమైతే షాకవ్వాల్సిందే. తొలి రోజు పది కోట్ల షేర్ అంటే పెద్ద పెద్ద స్టార్లకు మాత్రమే సాధ్యమయ్యే విషయం.

చాన్నాళ్లుగా సరైన సినిమా లేకపోవడంతో ప్రేక్షకులు కొంచెం పెద్ద స్థాయి సినిమా కోసం ఆవురావురుమని ఉన్నారు. కొన్ని వారాలుగా థియేటర్లు వెలవెలబోతున్నాయి. దీంతో తెలుగు రాష్ట్రాల్లో గురువారం మాగ్జిమం థియేటర్లలో ఈ సినిమాను వేసేశారు. దిల్ రాజుకు పట్టున్న నైజాం ఏరియాలో అయితే 70 శాతానికి పైగా థియేటర్లలో తొలి రోజు ఈ చిత్రాన్ని ఆడించారు. దాదాపుగా అన్ని చోట్లా హౌస్ ఫుల్సే పడ్డాయి. హైదరాబాద్ ఆర్టీసీ క్రాస్ రోడ్స్ పరిధిలో ఏకంగా నాలుగు థియేటర్లలో ఈ చిత్రాన్ని రిలీజ్ చేస్తే.. ఆ నాలుగు థియేటర్లలో నాలుగు షోలూ తొలి రోజు హౌస్ ఫుల్స్ పడటం విశేషం. టాక్ వసూళ్లపై ఏమాత్రం ప్రభావం చూపలేదనడానికిది రుజువు. ఇక ఓవర్సీస్‌లో ఈ సినిమా ప్రిమియర్లతోనే 3 లక్షల డాలర్ల దాకా వసూలు చేసింది. తొలి రోజు వసూళ్లు కూడా పర్వాలేదంటున్నారు. శుక్రవారమే ఈ చిత్రం హాఫ్ మిలియన్ మార్కును దాటేసే అవకాశముంది.